"അത് പന്നിക്കുഴി നാരായണിയല്ലേ?"

ചായക്കടച്ചാണ്ടിച്ചൻ തൻ്റെ കണ്ണട മൂക്കിൽ എടുത്തു വെച്ചു  സംശയം പ്രകടിപ്പിച്ചു. 

" പന്നിക്കുഴി നാരായണി " അവൾ ചെവി പൊത്തി വേഗത്തിൽ ഇടവഴിയിലേക്കു തിരിഞ്ഞു. 

 

രാവിലെ പാവനാശ്രമത്തിലെത്താൻ വെളുപ്പിന് അഞ്ചു മണിക്ക് എഴുന്നേൽക്കണം. പ്ലസ്ടുവിനു പഠിക്കുന്ന സുമയെ വിളിച്ചെഴുന്നേൽപ്പിക്കണം. വയസ്സായ അമ്മക്കു മരുന്നു കൊടുക്കണം. പിന്നെ അടുക്കളയിൽ പ്രാതൽ ഉണ്ടാക്കണം. 

 

മഠത്തിലെ മദർ സുപ്പീരിയർ മരിയയുടെ സഹായമാണ് ഈ കുടുംബത്തെ അല്ലലില്ലാതെ തട്ടിയും മുട്ടിയും മുന്നോട്ടു നയിക്കുന്നത്. വൃത്തികെട്ടതെങ്കിലും ഈ പണി ഉപേക്ഷിക്കാൻ വയ്യ. നാരായണി ഓർത്തു. 

 

മുറ്റത്തെ അമ്മച്ചിമാവിൻ്റെ കൊമ്പിൽ മാമ്പഴം ഈമ്പിക്കുടിക്കുന്ന അണ്ണാൻ കുഞ്ഞുങ്ങളും അമ്മയുമച്ഛനും.

കൊതിയോടെ ഒരു നിമിഷം നോക്കി നിന്നു. 

 

ചെറുപ്പത്തിൽ തൻ്റെ ഭയം മാറ്റാനാണ്  കരാട്ടെ ആശാട്ടി മാധവിക്കുട്ടിയുടെ കളരിയിൽ അമ്മ മകളെ ചേർത്തത്. കരാട്ടെയിൽ താലൂക്കിൽ ഒന്നാം സ്ഥാനം ലഭിച്ചുവെങ്കിലും ഇപ്പോഴും നാരായണിക്കു ഭയമാണ്. പൊന്തക്കാടുകൾക്കു നടുവിലൂടെയുള്ള ഏകാന്ത സുന്ദരമായ കാട്ടുപാതയിലൂടെ നടക്കുമ്പോൾ കിട്ടുന്ന ആനന്ദം അവർണ്ണനീയമാണ്. ഈ പ്രായത്തിലും ഇലഞ്ഞിപ്പൂക്കളുടെ ഗന്ധം അവളെ ഉന്മത്തയാക്കും.

   

പിറകിലത്തെ ഗേറ്റിലൂടെ അടുക്കളയിലെത്തി. മറിയച്ചേടത്തി കറിയ്ക്കരിയുന്ന തിരക്കിലാണ്. ഗോപികയും സഹായത്തിനുണ്ട്. വെളുത്ത ചട്ടയും മുണ്ടും ധരിച്ചു വരുന്ന മറിയച്ചേടത്തി ചിരിക്കുമ്പോൾ രണ്ടു സ്വർണ്ണ കുണുക്കുകളും വെട്ടിത്തിളങ്ങും. ആദ്യം ചെവിയിൽ ദ്വാരം അടയാതിരിക്കാൻ ഈർക്കിലിയായിരുന്നു. പിന്നെ അതു മാറ്റി ഒരു പവൻ്റെ രണ്ടു വലിയ സ്വർണ്ണകുണുക്കുകൾ ചേടത്തിക്കു കൊടുത്തത് മരിച്ചു പോയ സിസ്റ്റർ വേറോണിക്കയായിരുന്നു." വേറോണിക്കാമ്മയെക്കുറിച്ചു പറയുമ്പോൾ മറിയച്ചേടത്തിക്കു നൂറു നാക്കാണ്.

 

 നാരായണി അടുക്കളപ്പണിക്കു ആദ്യമായി അവിടെ വരുമ്പോൾ മറിയച്ചേടത്തിയായിരുന്നു "തെറാപ്പി " അവളെ പരിശീലിപ്പിച്ചത്.  തിരുമ്മലിനു ഇവിടെ വിളിക്കുന്ന പേരാണ് "തെറാപ്പി ". യൗവ്വനത്തിൽ നിറഞ്ഞു തുളുമ്പിയ മറിയച്ചേടത്തിയുടെ മാറിടം കാലത്തിൻ്റെ ഒഴുക്കിൽ താഴേക്ക് തൂങ്ങുന്ന പടവലങ്ങാ പോലെ   ശുഷ്ക്കിച്ചപ്പോൾ പാവനാശ്രമത്തിൻ്റെ സ്വർഗ്ഗീയ മണവാട്ടികൾ കണ്ടെത്തിയ പുതിയ തെറാപ്പിസ്റ്റാണ് യൗവ്വനം മാറിൽ മത്തങ്ങാ പോലെ പൂത്തു നില്ക്കുന്ന നാരായണിയെ. നാരായണി മതം മാറില്ലെന്നു ശഠിച്ചപ്പോൾ ദൈവത്തിൻ്റെ മണവാട്ടികൾ മൗനികളായി.

 

"ഇന്നു രണ്ടു സ്പെഷ്യൽ തെറാപ്പികളാണ്, സിസ്റ്റർ ക്ലാരക്കും സിസ്റ്റർ വന്ദനക്കും" .  മറിയച്ചേടത്തി ചെവിയിൽ മൂളുമ്പോൾ നാരായണി നാണിച്ചു തലതാഴ്ത്തി നിന്നു. 

ഭഗവത് ഗീതയിലെ കൃഷ്ണൻ്റെ ഉപദേശം തന്നെയാണ് മറിയച്ചേടത്തിയും പങ്കുവെച്ചത്.സുന്ദരിയായ കാർത്യാനി വർഷങ്ങൾക്കു മുമ്പ്  മഠത്തിൽ വന്നപ്പോൾ മേരിയായി ജ്ഞാനസ്നാനം സ്വീകരിച്ചു ചട്ടയും മുണ്ടും ധരിച്ചു കൃസ്ത്യാനിയായി.  "ഇറച്ചിവെട്ടുകാരൻ്റെ കർമ്മം ഇറച്ചിവെട്ടാണ്. ആ കർമ്മം നന്നായി ചെയ്യുക "

 

പാവനാശ്രമത്തിൽ നടക്കുന്നതൊന്നും പുറം ലോകം അറിയാറില്ല.ഇരുമ്പു ഗെയിറ്റും രണ്ടാൾപ്പൊക്കത്തിലുള്ള കരിങ്കൽ മതിലും അതിനു മുകളിൽ വൈദ്യുതി പ്രവാഹമുള്ള മുള്ളുവേലിയും ചാടിക്കടന്നു ആർക്കും ആ സ്വർഗ്ഗീയ മണവറയിൽ പ്രവേശിക്കാൻ കഴിയില്ല.  

മഞ്ഞ സാരിയും തലയിൽ മഞ്ഞ തൊപ്പിയും രുദ്രാക്ഷമാലയും ധരിച്ച   ഈ സ്വർഗ്ഗീയ മണവാട്ടികളെ ഗ്രാമീണർക്കു ബഹുമാനമാണ്. 
 

അന്നത്തെ ജോലി കഴിഞ്ഞ് നാരായണി തളർന്നു വീട്ടിലെത്തി.ഒരു മഴ പെയ്തതപ്പോൾ പതിവുപോലെ പന്നിക്കുഴിയിലെ നാറ്റം അസഹ്യമായി.അവൾ വാതിലടച്ചു സാമ്പ്രാണിത്തിരി കത്തിച്ചു.

നാരായണിയുടെ ചിന്തകൾ കാടുകയറി. വീടും പറമ്പും പണയപ്പെടുത്തി പത്തുലക്ഷം രൂപാ ബാങ്കിൽ നിന്നും കടമെടുത്തിട്ടാണ് ചാക്കുണ്ണി മുങ്ങിയത്‌. 

 

ജപ്തി നോട്ടീസ്  ഒട്ടിക്കാൻ കഴിഞ്ഞ ദിവസം ഉദ്യോഗസ്ഥൻ വീട്ടിൽ വന്നപ്പോൾ മാത്രമാണ് കൊടുംചതി അറിയുന്നത്‌. അന്നു രാത്രി അവൾക്കുറങ്ങാൻ കഴിഞ്ഞില്ല,

 

തെറ്റുകളുടെ പന്നിക്കുഴിയിലൂടെ നടന്ന യൗവ്വനം. ഫെയ്സ് ബുക്കിലൂടെ പരിചയപ്പെട്ട ചാക്കുണ്ണി എന്ന ചെറുപ്പക്കാരൻ്റെ മുമ്പിൽ വെറും പതിനേഴ് വയസു മാത്രമുള്ള നാരായണി തല കുനിച്ചു നിന്നപ്പോൾ അവൻ താലികെട്ടി. നഗരത്തിലെ ഒരു എണ്ണക്കമ്പനിയിലെ ട്രക്ക് ഡ്രൈവറും അറിയപ്പെടുന്ന ഗുണ്ടയുമാണു് അവനെന്നു വൈകിയാണറിയുന്നത്.

പന്നിക്കുഴിയിലാണ് താൻ വീണു കിടക്കുന്നതെന്ന്  മനസ്സിലായപ്പോഴേക്കും അവൾ ഗർഭിണിയായിക്കഴിഞ്ഞിരുന്നു.  ഈ വിവരം ചാക്കുണ്ണിയോടു പറയുമ്പോൾ അയാൾ ആഹ്ളാദിക്കുമെന്നാണ് അവൾ കരുതിയത്. പക്ഷേ അയാൾ പറഞ്ഞത് അത് ഒഴിവാക്കാമായിരുന്നു എന്നാണ്.  പിന്നെ അയാൾ വീട്ടിൽ വരാതായി.

  

ഉറക്കത്തിൽ താനൊരു വെളുത്തുരുണ്ട ശീമപ്പന്നിയായി മാറി പന്നിക്കുഴിയിൽ മലർന്നു കിടക്കുന്നു. തൻ്റെ അകിടുകളിൽ ഈമ്പിക്കുടിക്കുന്ന പന്നിക്കുഞ്ഞുങ്ങൾ. അവരുടെ മുഖത്തേക്ക് നോക്കിയപ്പോൾ അലറിക്കരയാൻ തോന്നി.  സിസ്റ്റർ വേറോനിക്കയും സിസ്റ്റർ സൈമണും സിസ്റർ വെണ്മയും സിസ്റ്റർ ഡൊറോത്തിയും മുഖം മറച്ച ധാരാളം സ്വർഗ്ഗീയ മണവാട്ടികൾ. 

 

ഈ പന്നിക്കുഴിയിലെ ജീവിതം മടുത്തു. നിശ്ശബ്ദം എഴുന്നേറ്റു ഇരുട്ടിൽ നടന്നു. മരണത്തിലേക്കുള്ള യാത്ര. ഗ്രാമം നല്ല ഉറക്കത്തിലാണ്. നടന്നു നടന്നു പുഴ കായലിൽ ചേരുന്നിടത്തെ ഇരുമ്പുപാലത്തിൽ കയറി കുറേ നേരം ചുറ്റും നോക്കി നിന്നു. ചാടാൻ തയ്യാറെടുക്കുമ്പോൾ, പെട്ടെന്ന് ആരോ പിറകിൽ നിന്നും തള്ളിയതുപോലെ അവൾക്കു തോന്നി.  മൂന്നുവട്ടം പൊങ്ങിയതോർമ്മയുണ്ട്. ബോധം വീണപ്പോൾ. ഒരു ചെറുപ്പക്കാരൻ തന്നെ നോക്കി ചിരിക്കുന്നതാണ് കണ്ടത്.  കായൽക്കരയിലെ ചെളിനിറഞ്ഞ കൈതക്കാടിൻ്റെ മറവിൽ താൻ  വെള്ളത്തിൽ തല ചായ്ച്ചു കമിഴ്ന്നു കിടക്കുന്നു.  അവൾ സാവധാനം ഏഴുന്നേറ്റിരുന്നു. ഉടുത്തിരുന്ന സാരി നഷ്ടപ്പെട്ടിരുന്നു. കരിമ്പനടിച്ച, മുഷിഞ്ഞു കീറിയ നിറം മങ്ങിയ അടിപ്പാവാടയും ബ്ലൗസും ദേഹത്തോടൊട്ടിക്കിടക്കുന്നു. ഭാഗികമായ നഗ്നതയിൽ നാണിച്ചു കൈകൾ മാറിൽ പൊത്തിപ്പിടിച്ചിരുന്നു.

"നിങ്ങളേതാ?"

അതിനുത്തരം പറയാതെ അയാൾ അവളുടെ കയ്യിൽ പിടിച്ചു അവളെ നില്ക്കാൻ സഹായിച്ചു. നനഞ്ഞ മണലിലൂടെ അവൾ വേച്ചു വേച്ചു നടന്നു. 

അയാൾ ആംഗ്യം കാട്ടിയപ്പോൾ അവൾ അയാളുടെ ബൈക്കിൻ്റെ പിറകിലിരുന്നു. മദ്യത്തിൻ്റെ രൂക്ഷഗന്ധം. അയാളുടെ ചുണ്ടിലെ സിഗററ്റിൻ്റെ പുക മുഖത്തേക്കു വീശിക്കൊണ്ടിരുന്നു.  അവൾ പറഞ്ഞ വഴിയിലൂടെ ബൈക്ക് ഓടി വീടിൻ്റെ പടിക്കലെത്തിയപ്പോൾ അവൾ കൽപ്പിച്ചു. " നിർത്തൂ " ബൈക്കു നിന്നപ്പോൾ നാരായണി ചാടിയിറങ്ങി തിരിഞ്ഞു പോലും നോക്കാതെ വീടിനുള്ളിലേയ്ക്ക് മിന്നൽവേഗത്തിൽ കയറി. ബൈക്ക് മുന്നോട്ടു കുതിച്ചു. 

 

ചെളിയിൽ നനഞ്ഞുലഞ്ഞ കേശഭാരവും വെള്ളം ഇറ്റിറ്റു വീഴുന്ന അടിപ്പാവാടയും  ബ്ലൗസും ധരിച്ചു നില്ക്കുന്ന അമ്മയെ നോക്കി നിന്നപ്പോൾ സുമയുടെ മനസ്സിലൂടെ വിവിധ ചിന്തകൾ കടന്നുപോയി.

ദൂരെ നിന്നേ മോട്ടോർ സൈക്കിളിൻ്റെ ശബ്ദം കേട്ട്  പാതി തുറന്ന ജനൽപ്പാളിയിലൂടെ അവൾ പുറത്തേക്ക്  നോക്കിയപ്പോൾ ഞെട്ടിയെങ്കിലും ഒന്നും സംഭവിക്കാത്ത മട്ടിൽ അമ്മയെ സ്വാഗതം ചെയ്തു. പക്ഷെ മനസ്സിൽ പറഞ്ഞു. "അമ്മ പന്നിക്കുഴിയിൽ കാലിട്ടടിക്കുന്നു" 

 

" സുമ സ്ക്കൂളിലേക്കു നടന്നു. 

വസ്ത്രം മാറുമ്പോൾ അമ്മ ചോദിച്ചു.

'അതിരാവിലെ തിരക്കിട്ട് എങ്ങോട്ടാടീ നീ പോയത്?" നാരായണി മൗനിയായി പുറത്തേക്കു ധൃതിയിൽ നടന്നു. 

 

മറിയച്ചേടത്തി പതിവുപോലെ അടുക്കള വാതിൽ തുറന്നു കൊടുത്തു. ഹാളിലെ പ്രാർത്ഥനയുടെ ഭക്തി സാന്ദ്രമായ ഗാനങ്ങൾ അടുക്കളയിലേക്കൊഴുകി വന്നു.

" പന്നിയിറച്ചിയും പോത്തിറച്ചിയും രാവിലെ തന്നെ പീറ്റർ കൊണ്ടുവന്നു. ഞാൻ നിന്നെ കാത്തിരിക്കുകയായിരുന്നു."

"പന്നിയിറച്ചി കൂർക്കയിട്ടു പെരളൻ വെയ്ക്കണം. പോത്തിറച്ചി കറിയാക്കണം' ' ചേടത്തിയുടെ കൈ കൊണ്ട് ഇറച്ചി ഉലർത്തിയാലെ സ്വർഗ്ഗീയ മണവാട്ടികൾക്കു തൃപ്തിയാകൂ.  

 

ചേടത്തി ഓർമ്മിപ്പിച്ചു. "ഇന്നു മൂന്നു തെറാപ്പിയാണുള്ളത്. സിസ്റ്റർ സൈമണിനും സിസ്റ്റർ വെൺമക്കും. 

സിസ്റ്റർ ഗീതക്കും" 

 

" ഉവ്വേ ഉവ്വേ "  

 

മദർ സുപ്പീരിയർ, ഈറ്റപ്പുലിയെപ്പോലെ തൻ്റെ മേനി ഉഴുതുമറിച്ച ശേഷം  മൊഴിഞ്ഞു. "നാരായണി നൽകുന്ന തിരുമ്മലിൻ്റെ സുഖത്തിൽ ഞാൻ ഏഴാം സ്വർഗ്ഗത്തിൻ്റെ മട്ടുപ്പാവിലേക്ക് ഒഴുകിപ്പോകുന്നു"

നാരായണി ചിരിക്കണോ കരയണോ എന്നറിയാതെ നിസ്സഹായതയോടെ മൂളി.

നാരായണീ വീട്ടിലെത്തി വിസ്തരിച്ചൊന്നു കുളിച്ചു.  മൂന്നുപേരും ഭക്ഷണം കഴിക്കാനിരുന്നു. അമ്മ കഞ്ഞിയും ചെറുപയർ തോരനും പപ്പടവും കഴിച്ചു നേരത്തെ എഴുന്നേറ്റു. സുമയും നാരായണിയും തനിച്ചായപ്പോൾ സുമ ചോദിച്ചു. 

"അമ്മേ ആ ബൈക്കിൽ അമ്മയെ ഇവിടെ കൊണ്ടാക്കിയ ആളാരാ?" 

നാരായണി മൗനിയായി. 

സുമ ഒന്നിരുത്തി മൂളി. നാരായണി അതവഗണിച്ചു. 

 

രണ്ടാഴ്ച കടന്നു പോയി. തവളകളുടെ കരച്ചിൽ രാത്രി മഴയുടെ താളത്തിൽ ചേർന്നൊഴുകി. 

പാതിരാ കഴിഞ്ഞപ്പോൾ, മൊബൈൽ ശബ്ദിച്ചു. അപരിചിത നമ്പർ. ചുവന്ന ബട്ടൺ ഞെക്കി. പക്ഷേ വീണ്ടും വീണ്ടും വിളി വന്നുകൊണ്ടിരുന്നപ്പോൾ

അവൾ  ഫോണുമായി കുളിമുറിയിൽ  കയറി വാതിലടച്ചു. പച്ച ബട്ടൺ ഞെക്കി. 

 

''നാരായണിയെ രക്ഷിച്ച ആളാണു ഞാൻ. ഫോൺ കട്ടു ചെയ്യല്ലേ. നിങ്ങളുടെ പണയാധാരം ബാങ്കിൽ നിന്നും എടുത്തു മുറ്റത്തെ പന്നിക്കുഴിയുടെ അടുത്തുള്ള  ആൽമരച്ചോട്ടിൽ വെച്ചിട്ടുണ്ട്." 

ഫോൺ നിലച്ചു. നാരായണി ശബ്ദമുണ്ടാക്കാതെ വാതിൽ  തുറന്ന് ആലിൻ ചുവട്ടിൽ മൊബൈലിലെ ടോർച്ചുമിന്നിച്ചു .അവിടെ കരിയിലക്കൂനയ്ക്കടിയിൽ നിന്നു പൊതി കിട്ടി.  ബാങ്കിൽ വെച്ച പണയാധാരം ഭദ്രമായി തിരിച്ചു കിട്ടിയിരിക്കുന്നു! 

 

" കൃഷ്ണാ ഗുരുവായൂരപ്പാ ഒരു കോടി നന്ദി"  

 

നാരായണിയ്ക്കു ഉറക്കം വന്നില്ല. ചിന്തകളിൽ അവൾ ഒഴുകി നടന്നു. അയാൾ ആരാണ്? വളരെ ചെറുപ്പം.  അയാൾ എന്തിനാണ് ഈ സഹായം എനിക്കു ചെയ്തത്?  ജപ്തിയിൽ നിന്നും ഒരാൾ തന്നെ രക്ഷിക്കാൻ ശ്രമിക്കുമ്പോൾ തടസ്സവാദം ഉന്നയിക്കുകയല്ല വേണ്ടത്. മനഃസ്സാക്ഷി മറുവാദമുന്നയിച്ചു. 

 

ദിനങ്ങൾ കടന്നു പോയി. ഒരു രാത്രിയിൽ അയാളുടെ ഫോൺ വിളി ."നാളെ വൈകുന്നേരം കുമ്പളങ്ങി കായലിൻ്റെ തീരത്തെ ഗണപതി ക്ഷേത്രത്തിൻ്റെ  അരികിലുള്ള തെങ്ങിൻ തോപ്പിൽ വരണം അത്യാവശ്യമാണ്‌".

രാവു മുഴുവൻ നാരായണി ചിലന്തിവലയിൽ കുടുങ്ങിയ പ്രാണിയെപ്പോലെചിന്തിച്ചു കിടന്നു. മുയലിൻ്റെ ചുണ്ടു വിറക്കുന്നതു പോലെ അവളുടെ മനം  വിറളി പൂണ്ടു. വെളുപ്പിനെഴുന്നേറ്റു മകളെ ഉണർത്തി, പ്രാതൽ ഉണ്ടാക്കി.  

നാരായണി അമ്മയോടു യാത്ര പറഞ്ഞ്  പാവനാശ്രമത്തിലേയ്ക്കു നടന്നു.  ഉച്ചവരെ ജോലി ചെയ്ത ശേഷം മറിയാമ്മച്ചേടത്തിയോട് പീരിയഡിൻ്റെ പ്രശ്നം പറഞ്ഞ് അവൾ ഇറങ്ങി.  വഴിയിൽ ഒരു ഓട്ടോ കിട്ടി. അവൻ പറഞ്ഞ സ്ഥലത്തിറങ്ങി  അവൾ വിറയാർന്ന പാദങ്ങളിൽ നടന്നു. ക്ഷേത്രത്തിനടുത്തുള്ള കാടുപിടിച്ചു കിടക്കുന്ന പൊതു ശ്മശാനത്തിലെത്തി. 

 

ഇവിടെ കുമ്പളങ്ങി കായൽ അതിസുന്ദരിയാണ്. തീരത്തെ തെങ്ങോലകൾ കാവടിയാടുന്നു. കായൽക്കാറ്റ് അവളെ കെട്ടിപ്പിടിച്ചു തെരു തെരെ ഉമ്മവച്ചു കൊണ്ടിരുന്നു.  പണിതീരാത്ത ഒരു അഞ്ചു നില കെട്ടിടത്തിനു ചുറ്റും  തലയുയർത്തി പന്തലിച്ചു നിൽക്കുന്ന ആൽമരങ്ങളും കാട്ടുമരങ്ങളും. 

മോട്ടോർ സൈക്കിളിൻ്റെ ശബ്ദം അടുത്തടുത്തു വന്നു കൊണ്ടിരുന്നു. മനസിൽ ഭയം പെരുമ്പറ കൊട്ടി.

അയാൾ വിദേശ വിപ്ലവനായകൻ്റെ ചിത്രം ആലേഖനം ചെയ്ത ചുവന്ന മങ്കിത്തൊപ്പി ധരിച്ചിരുന്നു. 

" കയറി വരു". 

അവൻ ആജ്ഞാപിച്ചു. അവൻ്റെ ശബ്ദത്തിൻ്റെ മുഴക്കത്തിൽ നാരായണിയുടെ ചുണ്ടുകൾ മുയലിൻ്റെതു പോലെ വിറച്ചു.  അവൾ അവൻ്റെ പിന്നാലെ സിമൻ്റ് പടികൾ കയറി രണ്ടാം നിലയിലെത്തി. 

മദ്യത്തിൻ്റെ രൂക്ഷഗന്ധം. അവൻ്റെ കണ്ണുകൾ ചുവന്നിരുന്നു. പടിക്കെട്ടിൽ അയാളുടെ അരികത്ത് അവൻ ഇരിക്കാൻ പറഞ്ഞപ്പോൾ അവൾ മനസ്സില്ലാമനസ്സോടെ അനുസരിച്ചു. 

 

" ഞാൻ ഗുണ്ടാവാസു.  ഇപ്പോൾ വീട് കണ്ണൂർ സെൻട്രൽ ജയിൽ. " 

നാരായണി നടുങ്ങി.

"എന്തു കുറ്റത്തിനാണ് വാസു ജയിലിൽ പോയത്?" 

"എൻ്റെ ഗേൾഫ്രണ്ടിനെ തട്ടിക്കൊണ്ടുപോയി പീഡിപ്പിച്ചു കൊന്ന ചാക്കുണ്ണിയെന്ന മൃഗത്തെ ഞാൻ കൊന്നു. എനിക്കതു മാത്രം പോരാ. ഞാൻ പരോളിൽ വന്നത്  സുന്ദരിയായ അവൻ്റെ ഭാര്യയെ  വില കൊടുത്തു വാങ്ങി എൻ്റെ ഭാര്യയാക്കാൻ ''